早前我哋有提過「明日大嶼」計劃有機會興建全港第一個專業賽車場，但其實喺有呢啲配套之前，香港嘅賽車運動其實一啲都唔差，甚至亦於唔同地區嘅比賽中得獎而回。而黎緊香港賽車代表區天駿就會參加2022亞洲利曼系列賽，比賽將於2月12-20日於中東阿聯酋密集上演。

區天駿於黎緊嘅賽事入面將會駕駛33號Precote Herberth Motorsport 保時捷 911 GT3 R戰車角逐GT組別，呢位車手今次已經係連續第6年參加杜拜賽道耐力賽，去年更贏過阿布扎比6小時耐力賽，除此之外亦曾參加過GT世界挑戰賽歐洲賽、24H耐力系列賽等世界級賽事，所以經驗實力絕對不俗。

2022亞洲利曼系列賽所有4場賽事，將於連續兩個週末進行，頭兩場比賽將於杜拜賽道上演，後兩場比賽則會轉至阿布扎比亞斯碼頭賽道定出冠軍。今屆賽事將集合超過40部賽車，其中包括GT3、LMP2及LMP3等唔同組別嘅賽車同場較技。

而香港代表區天駿所角逐嘅將會係有25部GT3戰車參賽嘅組別，參賽車隊及車手分別來自歐洲、北美及亞洲。每場比賽長度為四小時，將橫跨日夜進行，令賽事增添不少挑戰元素。