自從2019年F1與Netflix合作拍攝嘅紀錄影集《Drive to Survive》播出，就為F1吸引一大群年輕觀眾，亦令賽車運動重新進入主流大眾目光。而各個社交平台都出現以製作F1相關內容為主嘅創作者，進一步協助推廣F1。不過有報導指出，國外多個F1主題創作者近日不約而同地將頻道或用戶名稱中嘅「F1」字眼刪去，而背後原因就係F1正在取締其他人使用「F1」呢個字。

在 Instagram 查看這則貼文

Paddock Project（@itspaddockproject）分享的貼文

圖片：Shelovesvroomss

據《The Verge》報導，近日多名製作F1或賽車相關影片嘅外國創作者，都將佢哋名稱中原有嘅「F1」字刪去。例如YouTube上嘅「F1R THE GIRLS」，上個星期就改名為「Paddock Project」；TikTok上有10萬Fans嘅「Shelovesf1」就改名為「Shelovesvroomss」。雖然兩者都冇直接點出改名原因是否與F1要求有關，但「Shelovesvroomss」數日前上傳一條新影片，叫觀眾們「想像」你自己畀錢買F1門票，但因為去唔到而將門票轉贈他人，但後來就「被告知」唔可以再咁做，似乎暗示F1官方曾經就佢「送飛」一事聯絡過佢。另外當有人於留言問到「究竟發生咗咩事」時，「Shelovesvroomss」就回答：「咁多人依家黎改名係有原因嘅，唔係貪好玩」。

在 Instagram 查看這則貼文

Toni Cowan-Brown（@tonicowanbrown）分享的貼文

而F1獨立旁述員「Toni Cowan-Brown」隨後亦於IG及TikTok上傳影片分析事件。據佢講，早於六個月前佢就已經「聽到傳聞」F1會對使用名稱包含「F1」字眼，而且影片有牟利嘅創作者作出行動，當中包括指示旗下團隊拒絕於此類創作者合作。佢表示明白對於F1或任何機構黎講，保護自己嘅名稱、商標係一件重要嘅事，但佢唔認為「咁樣係保護你個商標嘅有效方法」。

Toni Cowan-Brown亦指出，2015年時NBA主席Adam Silver被問到會否取締社交平台上嘅非官方精華頻道，而佢則指出「非官方精華都係一種行銷手法」，換言之係對推廣運動有利。而F1目前嘅做法，似乎就係反其道而行。

資料來源：The Verge