一代重量級拳王泰臣(Mike Tyson)日前重返擂台，與年輕31歲嘅網紅拳手Jake Paul上演一場矚目拳場，雖然最終以點數落敗，但58歲仍咬緊牙關打足8回合，堅毅不屈嘅精神卻贏盡掌聲與尊重。唔知係咪受到泰臣嘅精神啟發，現年62歲嘅荷里菲特(Evander Holyfield)今日喺社交平台向泰臣下戰帖，希望兩人能在台上再戰一場，完成彼此之間嘅「三部曲」，仲話Fans們一定想睇。

泰臣與荷里菲特嘅恩仇可以追溯到90年代，兩位頂尖重量級拳手在1996年首次交戰，角逐WBA重量級拳王金腰帶，被外界睇好嘅泰臣除咗首回合打得有來有往，其後都落在對手節奏之中，最終在第11回合被荷里菲特TKO。翌年兩人在賭城年再度交手，戰至第三回合，不滿對手經常攬人又用「鐵頭功」嘅泰臣突然狂性大發，一口咬向荷里菲特耳仔，最終拳證終止比賽判泰臣落敗，同時成為拳擊史上經典一幕。

眼見泰臣日前回歸擂台，荷里菲特今早就突然喺IG貼出一張比賽海報，提議泰臣同佢再戰一場，完成第三部曲，仲話：「Fans會想睇 #未完成的事」不過，泰臣就好快就留言婉拒邀請：「我愛你兄弟，但三曲部就係我哋嘅友誼。」順帶一提，查實兩人喺2021年都傳過會為慈善名義再打一場，但最後不了了之。

View this post on Instagram

A post shared by EVANDER “REAL DEAL” HOLYFIELD (@evanderholyfield)

事實上，隨住時間流逝，呢對昔日死對頭早已冰釋前嫌，仲成日拎咬耳仔事件開玩笑，例如兩人曾在2013年為某運動品牌拍攝廣告，泰臣在片中撳響荷里菲特門鐘，對方開門後，泰臣送上一個裝有「耳仔碎」嘅盒仔，並幽默地表示：「對唔住，荷里菲特，呢個係你隻耳仔。」荷里菲特接過耳仔後開心表示：「我隻耳仔呀！」最後兩個仲嚟個深情擁抱，橋段認真搞笑。

經典重溫：

資料來源：marca