Supreme 呢個來自美國嘅 Skateboard-Themed 街頭品牌，相信大家都唔會陌生，我喺度都唔再大費周章去介紹呢個牌子，反正大家對佢了解多定少都係會照買照著架嘞；而講到 Supreme 最為普及性高之單品相信就係其品牌 Box Logo 之 Sticker。

其實 Box Logo Sticker 係當係喺任何一間 Supreme 門店消費，店員們喺將你買嘅嘢入緊袋嘅時候就會攝埋入去送畀你哋；而喺近呢幾年， Supreme 喺每季開季期間除咗會送例牌嘅 Sticker 外，更會額外贈送其他贈品。由 2016 年小試牛刀嘅 Fortune Cookie，到近幾季嘅 Poppy Seed Packs 、牙刷，Bouncy Ball…就算唔係有價有市，都起碼做到 Make some noise 嘅效果。

至於 SS19 就喺昨日 ( 2 月 21 日 ) 正式開季，除咗開季發賣之產品備受注目，眾多媒體及潮人爭相報導及搶先著用，又今季開季亦有其 Free Giving Item，就係…帽。聽到帽字大家就可能雙眼發光，但係其實係…浴帽，一頂白色作背景色，以 Mologram 式樣印上 Supreme 字樣之浴帽。Emmmm，法官大人，我無嘢可以補充，反正各位見到紅色字寫 Supreme 就會衝。