LEGO在去年8月宣布同Nike建立長期合作關係，並預告會喺2025年推出一系列聯乘產品，令唔少積木迷同潮人充分期待。事隔一年，最近網絡上就搶先流出首款聯乘球鞋照片，唔知大家睇完有冇心動，想唔想入手呢？

據球鞋情報帳戶「EldenMonitors」流出嘅照片，呢款聯乘球鞋以Nike Air Max DN為藍本，採用LEGO標誌性鮮黃色配色，鞋面帶有積木「粒粒」紋理，鞋舌上更印LEGO品牌logo，玩味十足！而Air氣墊部份亦充滿細節，分別印有LEGO人仔臉面圖案、Dn aIR字樣、Lego標誌以同一隻四眼吉祥物。

除此之外，鞋盒設計同樣別出心裁，除咗印有LEGO x Nike標誌，仲附有分隔板，畀大家將鞋盒改裝成LEGO磚塊嘅儲物盒。目前消息來源未有提到具體發售日期及售價，有興趣嘅朋友請密切留意官方消息。