男人超進化 XM Studio高級雕像

文：MenClub 魏文青　　
POSTED ON 25 Apr 2016

我成日話，今時今日做一個毒男，係幸福，同時又好辛苦嘅－－幸福唔使講，你淨係諗下睇完《Batman v Superman》冇耐，黎緊又話上《Civil War》又《Suicide Squad》又《Doctor Strange》又盛，真係諗起都興奮。但辛苦就辛苦在真係太多嘢睇、太多嘢買！好似啲Figure咁出極都有，錢銀事小，成日畀屋企個女人(阿媽我指)鬧你「又買玩具？」嗰下傷呀嘛！咁有冇解決方法？有！就係唔買玩具，升級買件藝術品返去－－唔係叫你講大話，係真係有藝術品買架！

由新加坡XM Studio出嘅雕像系列，喺行內都可以話係享負盛名。XM Studio由2012年成立，2013年推出第一件產品，就係上面呢隻極度仔細、非常大隻、而且仲贏埋「Statueforum」票選嘅「Best Large Scale (1:5 to 1:4) Statue of the year 2014」嘅美國隊長，XM本身都成為「Company of the year」，自此成為東南亞動漫雕像嘅熱門之選。之後再接再勵推出嘅Magneto更加喺幾個鐘之內完售800隻，兼且為XM蟬聯「Best Large Scale Statue」同「Company of the year」，仲贏埋「Statue of The Year」大獎添！

你可能會問，呢啲所謂嘅「藝術品」，同平時大家玩開嘅Figure有咩分別？第一最明顯嘅分別就係大細，由於XM Studio以1:4比例製作雕像，隨便一隻閒閒地都尺幾兩尺甚至三尺高。雖然就好巨型，但放大之後嘅好處，就係可以展現更多細節。加上XM Studio對於製作質素嘅執著，結果就係每一隻作品都嘅仔細程度都達到「驚人」嘅地步。例如美國隊長嘅上衣嘅紋理，甚至地台上面嘅水渠蓋、水泥磚都完美重現；而近期推出嘅Ghost Rider，當中電單車嘅火焰部份亦充滿華麗感！據說當時於新加坡動漫展開售時，只係憑一張設計草圖都可以吸引到大量買家落訂，可見買家們對於XM Studio出品嘅質素非常有信心！

市面上大部同類雕像，通常都只會以樹脂為材料，但XM Studio就會喺細位用上金屬部份。例如美國隊長拎住嘅嗰碌旗桿其實係不鏽鋼、Wolverine手上嘅爪尖亦打磨到可以刺穿紙張，而香港人未必好熟，來自《Inhumans》嘅Black Bolt個額上面嘅標誌更加係以銀造。除咗表示製作精良，你放喺屋企等啲親戚朋友上黎時仲可以(儘量)不經意地哂下命添！真係自信都返哂黎啦！

咁呢啲雕像又有冇不足之處？都有嘅。話到明係「雕像」，佢基本上就冇任何可動性，所以如果你嘅目標係自己砌一個場境出黎，雕像就未必適合你。不過雕像嘅好處就係佢嘅設計本身就緣自漫畫中嘅某啲場境。作為擺設，就比放喺玻璃櫃入面一隻隻企定定嘅Figure更加有動感。而且每一隻都有可更換部件(多數係頭同手)，有啲甚至連地台位置都可以轉，咁就唔怕擺極都係嗰個樣啦！另外值得一提嘅係XM Studio出嘅雕像大多以動漫原著為藍本，所以當隻Wolverine換咗個頭之後就唔係Hugh Jackman黎，戴住有翼頭盔嘅雷神亦唔多似Chris Hemsworth，Black Widow亦唔係Scarlett Johansson(太可惜啦！)。對於鍾情於原著嘅Fans黎講就應該係好事黎啦！

最後最後就係隻雕像嘅壽命啦！如果玩Figure嘅年資有返咁上下，都知保養方面其實幾麻煩。就算收哂入盒防哂潮，過咗幾年啲顏料都會開始氧化變色。而雕像嘅問題就相對小得多。除咗所用顏料不同，本身XM Studio嘅創辦兄弟喺做動漫雕像之前，係做戶外園境，幫新加坡公園嘅假山假石上色，如果連風吹雨打都頂得住，冇理由放喺屋企會唔得掛？由於壽命長，加上每隻產量有限，所以動漫雕像都有一定二手市場。唔少人更加會將佢當成錶一樣嘅投資收藏品添！
話就話大部份以漫畫設定為藍本，但XM都有出過以電影版為藍本嘅雕像。例如《Iron Man 3》入面嘅Mark XLII 而近期新出嘅仲有港漫《新著龍虎門》嘅「天下無敵」同「火雲邪神」
講咗咁大堆嘢，無非都係想話畀大家知，雖然市面上有唔少靚Figure，但在Figure之上，其實仲有如XM Studio或者Side Show之類嘅高質素雕像畀大家「升級」。好睇之餘又可以當收藏品傳落去，絕對唔止玩具咁簡單架！而上年XM Studio就喺香港正式開設代理，除咗上網訂之外亦可以親身去拎，有興趣就不妨上佢哋個網頁睇下啦！
xm-studios-hk.com XM Studios-hk on facebook 香港代理: G-Link (Hong Kong) Limited 地址 : 香港九龍新蒲崗爵祿街35号百勝工廠大廈9樓C1室電話 : 29976801 鴻發模型製作室(Show Room) 地址: 九龍觀塘開源道72號溢財中心1樓B室電話 :2342 7825, 2342 9065