【流動支付上線啦】香港搭的士都可以畀支付寶

文：MenClub 路兒　　圖：互聯網
POSTED ON 31 Oct 2017

冇夠Cash想搭的士，大家可能會選擇搭Uber，貪佢可以畀信用卡。不過家陣又多個選擇：用支付寶畀錢。相信應該好方便啦，對大陸遊客嚟講。

螞蟻金服宣布，將會同香港的士合作引入以支付寶收費，目前首批已經有數十架的士，接受支付寶同支付寶HK兩種支付方法，預計11月起會有幾千架的士投入服務。

屆時乘客畀錢用「支付寶」或「支付寶HK」手機App就得，分別係前者用人民幣結算，後者可以直接揀港幣畀錢。然後點選「掃一掃」，掃描司機個芒嘅QR Code，再輸入返車資銀碼；又或者畀司機掃描自己個QR Code去完成付款。確認付款後會收到收據，過程中唔會有額外手續費。

現時大陸支援支付寶付款嘅實體店舖超過20萬，單單係的士都超過50萬架。支付寶方面話，香港的士各自獨立營運，相比大陸出租車公司式經營，要推行流動支付難得多，今次可能係個起步點。