今年中AlphaGo三連勝世界排名第一的中國棋王柯潔一役大家可能仍然歷歷在目，當時柯潔落敗後不禁灑下男兒淚。事隔半年，佢似乎走出咗陰影，決定再次同人工智能對奕，不過今次嘅對手唔再係Google嘅AlphaGo，而將會係國產嘅AI棋手。

中國棋院12月27日舉行嘅記者會上宣布，2018年下旬世界女子圍棋賽期間，將於福建省同期舉辦2018世界人工智能圍棋大賽，並將邀請邀請來自中、日、韓、歐美等國家和地區的人工智能圍棋隊伍參賽，包括絕藝、天壤、CGI、DeepZenGo等等，但就未有提到AlphaGo。柯潔會以賽事形象大使的身份，出戰由天壤智能同福大自動化共同研發的AI棋手。

柯潔5月敗北後曾經喺微博表示，唔會再同AI比賽；但11月亦曾經被發現上線同台灣嘅人工智能CGI對奕，雖然場數唔多，但都令CGI團隊好興奮。今次正式復出，相信有狀態嚟多場人機大戰。對手之一天壤屬AI圍棋界新星，之前喺世界智能圍棋賽獲第四名，圍棋AI龍星戰中亦獲得季軍及「最佳新人獎」；至於福大自動化則從事工業自動化工程項目設計、安裝及調試等服務。