家陣啲手機全部都倒模咁樣，又全屏幕又雙鏡頭，想搵部有啲性格嘅真係唔易呀；但作為地表最硬代名詞嘅Nokia又點會咁易放棄！上次復刻完3310，今次就拎出《廿二世紀殺人網絡》入面奇諾李維斯都用既果部蕉仔電話——Nokia 8110，推出8110 4G復刻版，仲有黃色添，真係一碌蕉樣呀！

上次Nokia玩復刻出3310復刻版好收得，刺激全球總銷量上升至440萬；今回食住條水，再將1996年發布嘅8110翻兜，趁MWC世界流動大會推出復刻版。但今次醒啦一出就出4G版，唔會好似3310咁整個2G版先。當年8110有「蕉仔機」之稱，今回Nokia幽自己一默，出部蕉黃色，又幾有Feel。

呢款8110 4G外型上同1996年舊款大同小異，都係彎機如蕉狀，經典滑蓋設計一滑開即可接聽電話，仲有埋貪食蛇玩添。不過可惜復刻版並唔係運行Android，而係Smart Feature OS，所以都係裝唔到Google Play Store上嘅App。手機「貼心地」預載Facebook、Twitter、Google Map等，亦可以同步Gmail同Outlook行事曆，差在冇WhatsApp咁囉，真係感情分架喳。預計8110將於5月起開售，定價79歐元（約760港元），買個回憶都唔算貴啦，唔知可唔可以幫Nokia再創新高呢？