世衛正式列打機成癮為心理疾病

文：MenClub 路易斯　　圖：互聯網
POSTED ON 27 May 2019

雖然全世界都掀起咗電競熱潮，但上星期六(25/5)世界衛生組織(WHO)正式將「打機成癮」(Gaming Disorder)列為一種心理疾病，於2022年前各成員國需要將該疾病納入醫療體系，並提出治療及預防應對方案。有依靠直播打機賺錢嘅玩家對 WHO 嘅決定感到不滿，不過各位都不妨關心一下身邊有無朋友「打機成癮」。

WHO 日前於第72屆世界衞生大會上通過將遊戲障礙(Gaming Disorder，即「打機成癮」)列為一種心理疾病。究竟點為之「打機成癮」？佢嘅症狀包括無法控制地打機、逐漸將打機排喺其他生活興趣之前、即使有負面後果都持續或增加打機時間等。而確診患有「打機成癮」嘅患者，代表佢哋喺個人、家庭、社會、教育、職業或其他重要功能領域上已面臨重大傷害，並且至少持續12個月。

除咗影響日常生活，「打機成癮」傷害仲包括咗身體活動不足、飲食不健康、視力或聽力問題、肌肉骨骼問題、睡眠不足，以及社會心理功能問題等。世衛強調，鍾意打機同「打機成癮」係兩回事，但呼籲上癮人士要正視問題，及早求醫。有依靠直播打機賺錢嘅玩家對 WHO 嘅決定感到不滿，指自己多年嚟嘅努力竟然被當成殘疾。