Call車應用程式Uber喺英國倫敦上訴成功，法官撤銷咗對Uber營運牌照嘅禁令，而Uber獲得喺倫敦15個月嘅營運牌照。同樣係大都會嘅香港，究竟幾時先有Uber合法營運？

倫敦交通局(TFL)上年指責Uber喺「公共安全」方面「缺乏企業責任」，所以拒絕向Uber續發營運牌照。Uber喺上訴得值後承諾公司會作出改變，包括向警方報告嚴重事故、防止疲勞駕駛、向倫敦市政府分享數據，以及成立獨立董事會監察公司運作。

倫敦係Uber嘅主要市場之一，市內有約360萬個固定用戶，及約45000名Uber司機。Uber嘅CEO Dara Khosrowshahi正準備2019年進行IPO，而佢接受訪問時亦表示Uber有望喺明年上市。