世界盃目前正進行得如火如荼，有熱門球隊打出應有表現，亦有球隊令人失望，面臨出局邊緣。人生亦都一樣，唔係樣樣野都可以盡如人意、一帆風順的，而作為著名足球評述員兼教練，已經74歲嘅Peter黃興桂可以話經歷左人生好多嘅起起跌跌，雖然佢講波球迷們有彈有讚，但係佢對足球嘅熱誠卻係絕無花假，甚至可以話將佢嘅人生全部奉獻晒比足球！

Peter擁有一位作為商人嘅父親，本來可以繼承家業嘅佢卻對從商沒有半點興趣，相反年輕時已經非常熱愛體育運動，並喺美國完成學位回流香港之後，就去做體育老師，並成功為學校組建一支實力強勁嘅足球隊。

而其後喺一次機會下，Peter獲得當時東方教練嘅賞識，邀請佢成為球隊嘅助理教練，其後更喺主教練離任下坐正成為球隊嘅正式教練。由於出任教練多年，Peter及後獲得電視台邀請出任世界盃評述員，最終正式開展其「講波佬」生涯。

「我講波可以話自從我開始無教波之後，已經全職講左起碼20多年，已經差不多四分一個世紀了。」

講起講波生涯，又點可以唔提Peter嘅金句呢？而最令Peter印象深刻嘅就係「以蔗渣價錢，踢出燒鵝嘅味道！」

「其實起由就是我本身年輕嘅時候，我爺爺是很節儉的人，他雖然負擔得起，但他都認為我地要去國貨公司，買用蔗渣纖維做嘅襪，價錢係5蚊10對，呢種襪甚至好過一些大百貨公司來佬及靚嘅綿質襪。同時喺我細個嘅時候，我地家中有一個習慣，就係邊個生日，我地五兄弟姊妹，媽媽都會買一隻燒鵝番黎，生日個一位就有燒鵝脾食。最後兩樣野唔知點解陰差陽錯就合埋一齊。有一日愛華頓嘅比賽入面，我覺得呢隊波打出嘅表現真係好超值，價錢好平嘅球員，踢出頂級神奇嘅技術，所以我就話：愛華頓，真係以蔗渣嘅價錢，打出燒鵝嘅味道！」

而唔好睇Peter好似咁多金句好風趣好開心咁，其實佢嘅人生曾經歷多位至親離開，其中包括父親、妻子、好友等，而現在佢嘅弟弟亦都患上癌症。不過Peter仍然以樂觀嘅態度面對，呢一點真係非常之唔容易。

「唔好想住壞嘅遭遇，呢啲都已經係過去的事，你要振作、你要諗下將來，我覺得人要向前望的。」

另外Peter亦都鼓勵年青人：「若然你唔係對工作有熱情，你唔願意去包容對方，唔願意勤力咁向你嘅目標行，又經常抱怨，做唔到或難做嘅野就搵個藉口的話，咁就好難取得成功了。」

雖然已經超過70歲，但係Peter仍然未諗住退休，大家除左仲可以繼續聽到佢講波之外，佢更重操故業重返母校聖約瑟書院，成為學校嘅足球隊總監，有志培育一班年輕球員。喺Peter嘅挑選下，唔少球員都獲得發揮嘅機會，就好似以下呢位中一學生Justin咁，成功引發出其足球嘅潛力，未來將有機會成為一名出色嘅足球員。