今時今日嘅智能手機唔係鬥CPU快，就鬥Mon大、鬥價錢，不過而家仲有一樣嘢可以鬥，就係鬥鏡頭多！日前爆料達人Onleaks就喺Twitter放咗新一代iPhone XI嘅概念圖，同中嘅iPhone XI後置鏡頭進化到有3個咁多，但鏡頭嘅排列方式就有啲似中咗「輻射」咁，相信唔係人人都接受到。

Onleaks透露指，Apple今年將推出嘅iPhone XI將配備3鏡頭，其中一個為TOF深感鏡頭，用於3D拍攝方面，原理係透過傳感器發出經特製嘅近紅外線，而紅外線經物體反射後會由傳感器計算被拍攝景物距離，再結合傳統相機可以將物體3D輪廓以唔同顏色代表唔同距離，以地形圖方式呈現。

其實3鏡頭都唔算多，作為iPhone喺中國市場勁敵華為嘅最新旗艦手機Mate20都係採用咗3鏡頭系統，而Samsung嘅新手機Galaxy A9更加係以4鏡頭就為主要賣點。概念圖中嘅iPhone XI採用咗方形矩陣嘅3鏡頭排列方式可能係有特別原因，例如能夠提更好嘅圖片整合處理等，但外型的確比以往iPhone無咁討好。

來源：MacRumors