Elon Musk旗下嘅太空科技公司SpaceX喺去年除咗執行咗國家級嘅安全任務，亦達成咗一年21次火箭升空嘅里程碑。不過SpaceX似乎唔滿足於現狀，Elon Musk日前就喺Twitter上載咗一張名為Starship Hopper嘅巨型火箭概念圖，仲透露測試機型會同概念圖相似，但就無窗戶。

其實早於去年12月，喺SpaceX位於美國德州Boca Chica嘅發射基地就開始出現一個不鏽鋼製嘅「水塔」，日前Elon Musk終於喺Twitter上確認呢個係神祕火箭「Starship Hopper」，而Elon Musk估計Starship Hopper會以4至8星期後首次試飛為目標。

今次火箭Starship Hopper嘅外型同科幻電影火箭非常相似，佢採用火箭唔常用嘅不鏽鋼物料製造，由於Starship Hopper升空後需要返回地球，如果用上常用嘅碳纖為材料的話，就要喺火箭外層加上隔熱材質去保護碳纖機身，因此喺高溫下不鏽鋼表現比碳纖維材料更好。另外SpaceX指出，若以「全裸」不鏽鋼為火箭機身，唔會比裝上隔熱材質嘅碳纖重好多，而且無論喺生產、加工、組裝方面，不鏽鋼都比碳纖更平，組裝更容易，難怪Starship Hopper組裝速度咁快！

來源：Engadget