喺美國拉斯維加斯舉行嘅2019 CES(國際消費電子展)又有新嘢登場，韓國車廠Hyundai喺展覽上發布咗名為「Elevate」嘅UMV (Ultimate Mobility Vehicle) 終極機動車輛，以電力驅動嘅Elevate有別於現時科技巨頭開發嘅飛行車，而佢係一部配備多用途四足嘅可步行嘅救災車輛。Elevate可以模擬哺乳動物嘅爬行前進，能夠深入經歷地震瓦礫滿佈嘅地方進行拯救。

韓國車廠Hyundai喺2019 CES為大家帶嚟驚喜，今次佢新發布嘅係能夠爬行嘅多用途四足救災車輛Elevate。喺一般情況下Elevate會以一般車輛模式行駛，但如果深入險要地勢佢就可以進行變型，使用配備萬象軸承嘅多用途四足爬行，佢除咗能夠喺瓦礫上自由穿越，仲可以爬上5英呎高嘅垂直牆面。

Hyundai負責人指出，Elevate可以喺救援工作上使用，令救援人員能夠更快抵達災難現場進行拯救，免受道路、橋樑嘅損壞所影響。除咗救援工作，Elevate仲可以變成無障礙車輛，佢設有自動升降嘅輪椅坡道，可以協助殘疾人士出行。