唔少人都鍾情於細機，而過去曾經以Apple iPhone 5及5s外型推出嘅iPhone SE更大受細機用家歡迎！不過自去年Apple推出iPhone XS、XR系列新機後，4吋Size嘅iPhone SE就由Apple Store中下架，而且呢款iPhone一直無推出後繼機型，令唔少Fans失望！不過事隔數月，iPhone SE再度於美國Apple Online Store出現，而且售價亦大減，唔知幾時有香港份呢？

喺美國Apple Online Store中，被下架嘅iPhone SE重新出現，當中分別有32GB及128GB版本，售價分別為249美元及299美元，並依舊提供黑、銀、香檳金、玫瑰金四種顏色選擇。iPhone SE最大嘅特點就係佢個4吋Mon，加上喺呢個價錢下，佢採用咗Apple A9 處理器 + M9 處理器，配合1200萬像素後置鏡頭，加120萬像素前置鏡頭組合，以及iOS系統加持，性價比非常高！

目前嘅智能電話發展趨勢朝住「誰大誰惡誰正確」方向走，一手能夠掌握嘅4吋iPhone SE自然成為手機市場中嘅奇珍異寶，可惜現時手機市場日漸飽和，Apple推出iPhone SE2嘅可能性越嚟越低，而今次iPhone SE再度於美國Apple Online Store上架似係為清貨居多，所以iPhone SE睇嚟要再一次失望。