仲有唔夠兩星期就到農曆新年，今年Apple同往年一樣以最新iPhone拍攝咗關於過年嘅微電影，而今次Apple就搵嚟著名導演賈樟柯拍攝微電影《一個桶》。電影全部畫面都以Apple去年推出嘅iPhone XS拍攝，而故事就講述於中國大城市發展嘅主角，喺家鄉過完農曆新年返回大城市嘅經過。

Apple農曆新年微電影《一個桶》搵嚟擅長故事片及紀錄片嘅著名中國導演賈樟柯拍攝，《一個桶》電影中男主角農曆新年返鄉後回到大城市，而主角母親準備咗一個裝有家鄉食品嘅白色膠桶，希望主角返回大城市都能夠體會家鄉味道。同時喺電影片尾亦展示出幾張由iPhone XS拍攝，充滿過年氣氛嘅照片。

去年嘅Apple農曆新年微電影《三分鐘》由香港導演陳可辛拍攝，係講述農曆新年返鄉下嘅賺人情感故事，而今年嘅《一個桶》似乎係延續緊呢個故事，將家鄉嘅情帶回大城市。另外，雖然微電影由iPhone XS拍攝，不過片尾都有指出「使用額外設備及 App」，所以如果大家想拍到好似微電影咁嘅級數，都有需要借助拍攝器材。