噚晚Apple發布咗去年第四季度業績，一如大家所料Apple業績出現倒退，營業收入更出現2001年以來首次第四季度增長下滑。而Apple CEO Tim Cook就指出，iPhone銷情不理想其中原因係部分地區定價過高，並認為部份地區iPhone需要減價。

其實Apple早就知道季度業績會出事，所以去年年底早早就發出咗盈警，並決定不再公布iPhone、iPad及Mac銷量。Tim Cook表示，喺美國本土市場中新iPhone嘅定價與2017年分別不大，但指出海外市場受到美元匯率走強所影響，及部分地區定價過高，所以iPhone銷售額按年跌15%至519億美元。

整體嚟講，Apple季度業績唔算太差，上季收入為843億美元，調於市場預期嘅840億美元，而每股盈利4.18美元，亦較4.17美元預期為高。另外，除咗iPhone之外，Apple嘅App Store、Apple Pay、iCloud及搜索廣告等收入創歷史新高，以上嘅服務收入上季為108億美元，符合市場預期，毛利率更高達63%，而Apple目前嘅服務及第三方服務有3.6億訂戶，目標係至2020年底增至5億。