能夠加入最頂級嘅體育聯賽成為職業運動員係唔少人心目中嘅夢想，因為你可以玩自己最鍾意嘅運動，同時又可以有非常可觀嘅收入。不過，你又知唔知即使係最頂級嘅聯賽，運動員嘅待遇亦都可以有好大分別的！

唔講你可能會以為英超球員會係地球上搵最多錢的，但原來佢地係連前三都入唔到！根據最新統計，NBA係全世界運動員平均年薪最高嘅體育聯賽，佢地當中嘅球員平均年薪達到777萬美元，年薪中位數則達到432萬美元。

而排名第2位嘅係印度超級板球聯賽，球員平均年薪為506萬美元；第3位則係MLB，球員平均年薪為451萬美元；第4位係英超，球員平均年薪為394萬美元；第5位係NFL，球員平均年薪為291.2萬美元。

自從2016-17球季NBA開始執行新嘅轉播合同後，球員薪酬就水漲船高，基本上千萬年薪合同變得平平無奇，球員薪酬不斷大幅增加，而巨星嘅加幅就更加明顯，好似作為聯盟人工最高嘅Stephen Curry今年年薪就達到3700多萬美元。就算唔睇最頂級嘅巨星，今年NBA就有46位球員人工達到2000萬美元或以上，1000萬美元樓上嘅則有135人，要知道NBA實際只有450位球員，亦即係話有30%球員嘅年薪達到1000萬美元以上。

再細睇入去球隊嘅話，NBA平均年薪最高嘅球隊係雷霆嘅1033萬美元，勇士則係1029萬美元。不過，全球平均年薪最高嘅球隊並唔係雷霆，而係西甲班霸巴塞隆拿，佢地嘅平均年薪達到1380萬美元，而皇馬則為1060莓萬美元。

值得一提嘅係，中超嘅平均年薪排名第11位，球員平均年薪為105萬美元，而日本足球聯賽J-League則排名全球第14位，球員平均年薪為32萬美元。