Apple Watch救人一命嘅新聞已屢見不鮮，而自去年Apple Watch Series 4推出咗後，加入咗兩大新功能「ECG心電圖」及「跌倒偵測」，去年12月ECG心電圖功能已經成功「開齋」救咗Reddit用戶一命，而近日「跌倒偵測」亦都成功喺挪威及時拯救一位不慎跌倒嘅67歲老翁。

日前挪威廣播電視公司(Norsk Rik-skringkasting)報道指，一位67歲挪威老翁Toralv Østvang不慎於家中洗手間跌倒，期間老翁身上並無帶手機，但就靠身上唯一配戴嘅Apple Watch Series 4自動進行緊急報警救回一命。由於Apple Watch Series 4配備咗高達32 g-force嘅加速感應器及新陀螺儀，可夠偵測用家失足跌倒，一旦用家跌倒就會發出「嚴重跌倒提示」，用家可以選擇致電緊急服務或者關閉提示，但如果用家喺60秒後無任何回應，Apple Watch就會自動打緊急電話，並向你嘅緊急聯絡人傳送訊息。

事件中，Toralv Østvang當跌倒後已經失去意識，而佢嘅Apple Watch Series 4自動進行緊急報警，並通知了急救中心。而Toralv Østvang嘅女兒就指出，父親可能係半夜去洗手間如廁時不慎跌倒後暈在地上，幸好Apple Watch檢測到，然後又及時打出SOS電話。跌倒偵測功能會為65歲以上用戶自動啟動，非常適合老人家配戴，家有一老嘅不可以考慮吓。

來源：Norsk Rik-skringkasting