嚟自日本近畿大學嘅科學研究團隊近日對史前巨獸長毛象研有突破性進展，團隊早於2011年喺俄羅斯西伯利亞永久凍土發現一隻保存完好的長毛象，最近更成功將長毛象細胞移植至老鼠細胞中，並成功誘發2萬8000年前嘅細胞出現活動。

活躍於冰河時期嘅史前巨獸長毛象至今已絕種超過4000年，而日本近畿大學嘅科學研究團隊早前於一隻冰凍嘅完整長毛象腿部採集肌肉及骨髓組織，並抽取細胞核，然後移植至數十隻老鼠嘅卵細胞內，其中5個卵細胞出現細胞分裂前會形成嘅紡錘體(Spindle Apparatus)。

研究人員宮本圭表示，目前大部分研究仍將焦點放喺分析化石DNA上，移植嘅細胞中部分形成咗紡錘體，意味經過無數年細胞活動仍能發生，而且部分活動能重新創造，但細胞分裂尚未出現，所以距離讓長毛象復活仲有好遠嘅路。研究結果刊載於「科學報告(Scientific Reports)」期刊。

來源：Kindai Picks