真係乜都無！Samsung新推出中階智能手機Galaxy A80嘅熒幕真係一啲多餘嘢都無，因為佢採用咗非常具科技感嘅「旋轉鏡頭技術」，所以前後Cam都共用同一組3鏡頭系統，加上手機聽筒亦由磁力震動發聲所代替，機面無設有任何聽筒開口，令到呢部A80成為真正全熒幕手機。一直期待有真正全熒幕手機嘅你，對Samsung呢部A80有無興趣呢？

Galaxy A80係Samsung第一部採用「旋轉鏡頭技術」嘅智能手機，啫係話無論前鏡定後鏡都係用同一組3鏡頭系統，當中包括4,800萬像素F2.0大光圈主鏡頭、123度超廣角鏡頭及可進行深度測量嘅ToF(Time of Flight)3D深度鏡頭。A80同時內置同Galaxy S10一樣嘅Super Steady錄製功能，拍片可以減緩震動，令短片更流暢穩定。

A80嘅「旋轉鏡頭技術」係全自動，唔需要人手旋轉，只要用家喺相機中轉換至自拍模式，鏡頭就會自己轉向自己。鏡頭用上旋轉技術唔只可以加大熒幕佔比，仲可以確保前後Cam影相一樣質素。不過佢最大嘅缺點係慢，當你撳掣轉自拍時，機背嘅鏡頭位置緩緩升起，然後反轉向前，時間大約要1秒多啲。雖然1秒唔係好長，但有時候影相嘅瞬間係一迅即逝，捕捉唔到就無。

作為中階機，相信Samsung今次於A80上首次採用「旋轉鏡頭技術」係屬於實驗性質，一旦反應好相信會於旗艦機上採用，咁Flip Cam點都好過熒幕上開孔嘅。今次A80受惠於「旋轉鏡頭技術」，令熒幕佔比達到93%，用家可以徹底體驗6.7吋FHD + Super AMOLED(20:9)屏幕，加上配備Dolby Atmos聲音技術，睇片、打機作為中階機絕對收貨。

規格方面，Galaxy A80 配備3,700mAh大電池，外加25W超快速充電功能，電量足夠每日正常使用。另外，A80提供括魅影黑、幻魅金及魅光白3色選擇，仲支援熒幕指紋解鎖、雙卡雙待、USB Type-C，備有高通 SM7150 8核處理器，內置128GB(RAM 8GB)。

A80將於2019年第二季推出，但售價仍有待公布，估計大約4千元左右，想買嘅就要等等喇！