日本《日經新聞》日前爆料指，任天堂將於今年秋季推出體積更小、價錢更平、便攜性提升嘅Switch，睇嚟消息好大機會成真！因為上月《華爾街日報(The Wall Street Journal)》亦有報道指，任天堂正計劃喺6月E3遊戲展發布兩款新Switch遊戲主機，分別為「平價版」及「高性能」版本，不過推出日期就有所出入，相信係Switch推出日期延遲所致。

《日經新聞》嘅報道指出，即將於秋季推出嘅Switch體積較小，主要賣點為遊戲機便攜性，而且售價亦相對親民，同時仲支援熒幕輸出功能，相信呢個體積較小版本Switch就係《華爾街日報》所提及嘅「平價版」Switch。報道續指，喺過去30年任天堂家用主機部門一直與手提遊戲機部門內部競爭，但未來任天堂將統一軟件開發部門，以便整合資源挑戰市場上其他遊戲機。

而《華爾街日報》上月提及嘅「高性能」版本Switch推出日期將被延期，消息指「高性能」版將整體重新設計，以進行性能提升，但目前仲未有更多有關「高性能」版嘅消息，大家只能夠耐心等吓。

來源：The Verge