杜克大學陣內嘅超級球星Zion Williamson，憑住勁爆嘅身體質素及出色嘅表現，已經成為全美嘅寵兒。雖然最終喺Williamson嘅帶領下，杜克大學未能奪得NCAA嘅全國冠軍，但係其今夏NBA選秀狀元第一大熱身份並未有受到任何影響。

預計Williamson將會成為繼LeBron James後最受矚目嘅超級新秀，其今夏選秀狀元身份基本已經非常穩，每一支有機會獲得狀元簽嘅球隊都會想得到呢位「飛天坦克」，並都幾肯定佢一加入球隊就會成為球隊嘅絕對核心。

除左核心身份上嘅肯定，Williamson錢途上亦都非常有保證，甚至有機會成為NBA史上最高收入嘅新秀！

2003年以高中生狀元身份加入NBA嘅LeBron James，單係與Nike籃球鞋合同已經為佢帶黎超過9000萬美元嘅收入，再加上新秀狀元合約4年1800多萬美元，佢一加入NBA已經坐擁1億美元嘅保障性合同收入。而如今，Williamson將會更誇張！

據消息指，Williamson嘅籃球鞋合同預計將會超過1億美元，甚至可能係1.1億美元起跳，其後據NBA總裁Adam Silver指，今年嘅NBA選秀狀元將會獲得一份4年4400多萬美元嘅合同，因此Williamson好有可能一進入NBA就獲得價值達到1.5億美元嘅天價合同。

Williamson嘅價值相信已經有目共睹，一場NCAA比賽可以將票價由70美元變成4000美元，並且係一票難求；一對著爆嘅籃球鞋可以拍賣至超過30萬美元；一次爆鞋令上司公司價值一日內蒸發超過10億美元。以上嘅事件，足以說明Williamson嘅影響力究竟有幾恐佈，亦都證明佢背後嘅吸金力會有幾強。