串流音樂平台龍頭大哥Spotify 付費訂閱用戶人數突破1億人，較市場預期嘅9900萬人為多，並拋離Apple Music 付費訂閱用戶人數達兩倍！如果計埋免費用戶的話，Spotify 嘅活躣用戶達到2.17億人，不過Apple Music 喺串流音樂仲係後起之秀，加上訂閱用戶人數增長速度驚人，喺4月初已經於美國本土市場收費訂閱用戶超越咗Spotify，睇嚟將來兩者仍然會有一番惡鬥。

瑞典串流音樂平台Spotify 日前於第一季財務報告中公布指，公司目前幾乎一半用戶都係付費訂閱用戶，而付費訂閱用戶人數按年上升32%至1億人，高於市場預期嘅9900萬，令Spotify 繼續坐穩串流音樂平台龍頭寶座。不過Spotify承認指，最近訂閱人數增長大多係受惠於一啲慨慷慨促銷活動，所以Spotify 虧損情況為每股虧損0.79歐元，較市場預期每股蝕0.35歐元為差，令Spotify 開市後倒跌，收報$138.14，下跌0.08%。

雖然Apple 喺最新嘅公司報告上指出，Apple Music付費訂閱用戶人數於1月份為5000萬人，較Spotify 嘅1億人少足足一倍，不過Apple Music 屬串流音樂平台嘅後來者。Apple Music 於美國本土客戶增長速度驚人，目前正以2.6%至3%嘅速度增加，4月初亦於美國市場超越Spotify成為最多收費訂閱用戶串流音樂平台，加上Apple 正發展Apple TV、Apple News等服務平台，假如將來Apple 將來以捆綁方式推出服務，Spotify 將面臨強大對手。

來源：Reuters