噚日仲講緊EA 旗下嘅大逃殺射擊對戰遊戲《Apex Legends》打算伙拍騰訊打入中國市場，不過中國目前對遊戲審批非常嚴謹，究竟要點先可以喺中國取得遊戲版號？騰訊旗下嘅新「食雞」遊戲《和平精英》做咗一個好例子！取代本來《絕地求生》嘅《和平精英》大幅度刪減暴力元素，玩家死後仲會向射殺者揮手道別，真係夠晒和平。

點解騰訊喺中國本來已經有兩款「食雞」遊戲《絕地求生：全軍出擊》、《絕地求生：刺激戰場》，仲要推出多個《和平精英》取而代之？因為《絕地求生》嘅遊戲版號一直未獲審批，令到呢個咁受歡迎嘅遊戲一直未能夠商業化，即係無錢賺，所以就要推「和諧版」食雞遊戲《和平精英》！

至於「和諧版」食雞遊戲《和平精英》有幾和平？首先係遊戲中刪減晒所有血腥元素，以往喺《絕地求生》中射人嘅血液特效會由閃光特效取代。

而玩家射殺咗敵人後，對方唔會即刻變盒，而係先向玩家揮手道別，場面份外溫馨。

玩家嘅「生命值」會變為「信號值」，食「信號電池」(即以往嘅能量飲品)就會加強「健康值」。另外， 以往嘅「毒圈」都會加上「信號」標誌，以表示喺「毒圈」內會扣減玩家嘅「信號值」。

至於成功贏咗遊戲「食雞」又會點？遊戲會為勝出隊伍送上蛋糕慶祝，而且仲會有跳舞慶祝環節出現！

騰訊官方指出，《和平精英》與以往嘅《絕地求生》遊戲數據並無同步，而原本唧《絕地求生》亦會結束營運。

來源：微博