一不離二，繼新 iPhone XR 嘅渲染圖曝光後，知名爆料達人 Slashleaks 今次就發放咗 iPhone 11 嘅保護殼概念圖，由圖中可以睇到 iPhone 11 採用咗 3鏡頭設計，而整個鏡頭組位置呈方形兼凸起，似足新 iPhone XR 一樣，不過大家又接唔接受到呢種設計呢？

手機配件製造商向來都係快人一步知道新 iPhone 設計外觀，以便製造出唔同嘅手機周邊產品。而今次爆料達人 Slashleaks 就發放咗 iPhone 11 手機殼設計概念圖，圖中 iPhone 11 嘅3鏡頭凸起位置非常明顯，而所佔面積都比歷代 iPhone 都要多，並呈圓邊方形設計。

此外5.8吋 iPhone 11 及 6.5吋 iPhone 11 Max 鏡頭凸起部分大細都係相同，啫係話 iPhone 11 Max 嘅鏡頭位置睇起上嚟會比 iPhone 11 細一啲，亦無咁明顯。

早前另一爆料達人 OnLeaks 於今年1月曾指出，新 iPhone 嘅 3鏡頭係以三角形的形式排列，而方型鏡頭凸起部分更有 Apple Watch 咁大，今次嘅手機殼概念圖充分顯示出呢啲元素。而知名蘋果分析師郭明錤亦表示，第三個鏡頭係超級廣角鏡頭，用上咗某種黑色塗層處理，令鏡頭無咁容易發現。最後新 iPhone 11 及 iPhone XR 將預計於今年 9月推出，到時大家就知 iPhone 真面目係點喇！

來源：9to5Mac