日本鐵路「JR東日本」日前向媒體展示新一代新幹線試驗車「ALFA—X」，全名為「Advanced Labs for Frontline Activity in rail eXperimentation」。「ALFA—X」早前向傳媒公開過列車車頭，而今次 JR東日本將全長約250米嘅10節車廂組成完整列車公開，而「ALFA—X」嘅目標營運速度係時速360公里，呢個速度比中國最新高鐵「復興號」嘅營運時速350公里仲要高，有望挑戰世界最高速列車。

今次 JR東日本首次展示出新幹線試驗車「ALFA—X」全貌，整列列車由貌似「長鼻」嘅車頭及10節車廂組成，全長250米。而 JR東日本表示，川崎重工負責製造「ALFA—X」1至6號車廂，日立就負責製造7至10號車廂，而每個車廂嘅窗戶大小各有不同，當中仲有無窗戶嘅車廂，咁樣設計係為咗確認取消窗戶能否有助於車內靜音，或調整直射日光導致車內升溫。

「ALFA—X」嘅車頭外觀設計都成為咗大家關注點之一，呢個貌似「長鼻」嘅車頭長達22米，而車頭咁長嘅目的係為咗減輕列車高速進入隧道時所產生嘅壓力，同時亦可以降低車廂內嘅噪音。另外，「ALFA—X」搭載，咗先進避震技術及緊急系統，一旦列車遇上地震都可以緊急停車，並防止出軌。

由5月10日開始，「ALFA—X」將會於東北新幹線嘅「仙台—新青森間」，於晚上每星期進行2次左右嘅行駛試驗至2022年3月，而呢個實驗結果將會作為確認列車能否以時速360公里穩定行駛嘅「第一階段」；至2022年度後會展開「第2階段」，列車會進行提高車內服務嘅相關試驗。「ALFA—X」嘅目標時速360公里係屬世界最快嘅高速鐵路行車速度，如果能以時速360公里行駛，約4小時就可以連接東京至北海道札幌。

來源：Nikkei