科技大亨 Elon Musk 旗下嘅隧道挖掘公司 The Boring Company 日前獲 Las Vegas 會展與觀光局(LVCVA) 投票批准簽訂價值4860萬美元合約，Boring Co. 將會喺 Las Vegas 地底建造兩條車用隧道、三個車站，以及一條行人隧道。

LVCVA 喺今年3月曾經指出， Las Vegas 地下隧道項目預計將於2021年1月前完成，可以及時用於美國消費電子展(CES) ，當時 Elon Musk 隨即喺 Twitter 上發文指出該項目可能喺今年年底前運行，相信呢個係其中令 Boring Co. 獲批合約嘅原因之一。不過過去 Boring Co. 嘅建造地下隧道結果都唔如意，早前於美國 Chicago 一項價值10億美元嘅機場隧道項目亦因當地新任市長反對而流產，所以如果今次 Las Vegas 隧道項目順利的話有望成為 Boring Co. 第一條正式投入服務嘅地下隧道項目。

今次 Boring Co. 負責嘅 Las Vegas 地下隧道項目名為「LVCC Loop」，合約內容包括建造兩條車用隧道、三個車站，以及一條步行隧道。路線方面，隧道預計由地底穿過 Las Vegas 正在擴建嘅會議中心，總長1.3公里，主要用於幫助遊客喺會展中心嘅幾棟建築之間穿梭。如果「LVCC Loop」項目進展順利，未來路線有望擴展至 Las Vegas 機場、市中心，甚至 Los Angeles 等地，預計路線最高時速可達到250公里/小時。