一如所料 Apple 於一年一度嘅 WWDC 2019 中推出咗全新 iOS 13 作業系統，當中傳咗好耐嘅 Dark Mode 正式登場，而 Apple 亦改善咗地圖功能及相片介面等，究竟呢啲新功能吸唔吸引呢？一齊睇睇！

遲來的 Dark Mode

相信 Dark Mode 對唔少讀者嚟講都唔陌生，YouTube、Telegram 以及某登討論區都一早推出咗，所以 Apple 今次推出 Dark Mode 都算係有啲遲。

當用家喺 iOS 13 上啟用咗 Dark Mode 後，整個 iOS 13 系統都會變成暗色系配色，包括系統外觀及大部分應用程式都會採用更暗背景、更光文字、高對比度及其他元素呈現。此外，暗色系或純黑色能亦夠降低OLED熒幕耗電量，可以幫助提高手機續航能力。

拍攝及相片介面改善

今次 Apple 就喺 iOS 13 嘅相機人像模式中加入咗「High-Key Mono」嘅高色調黑白模式，令用家可以喺人像模式中拍攝出更靚嘅單色圖片。而用家亦都可以喺人像模式所拍攝嘅相片中，後製調整光線強度效果，類似喺攝影棚中將燈光位置向前、向後移動之後嘅效果。

喺 iOS 13 中，相片介面今次就得到改善喇，當中採用咗全新嘅瀏覽方式，用家可以按年、月、日嘅區間瀏覽特定時期相片。而 Apple 今次仲用上咗 on-device 嘅 MachineLearning 技術，將影片、相片及 Live Photos 等內容以 Curate 方式主題化呈現，展現與過去唔同嘅瀏覽照片方式。

完善Apple Maps功能

自從 Apple 喺 iOS 7 中推出 Apple Maps 以來，口碑一直唔及 Google Map，Apple 為咗扭轉局面近年不斷投入資源為 Apple Maps 收集更完整資料。今次 iOS 13 中，Apple Map 得到重新製作，除咗加入更地地標資料外，同時亦加咗實時交通狀況、E.T.A 預計到達時間等，仲可以將 Apple Map 內部分享畀朋友好添。

不過目前擁有更詳細資料、更精準地圖內容 Apple Maps 只可以喺美國部分城市體驗，預計年底前全美國地圖都可以使用，而至2020年仲會拓展支援更多國家。

Hands-on功能支援AirPods分享音樂

iOS 13 中嘅另一焦點就係加強咗嘅 Hands-on 功能，佢加入全新嘅 Audio Sharing 功能可以令用家透過 iPhone 或 iPad，快速使用另一個 AirPods 分享正在聽緊嘅音樂。

HomePod 喺 iOS 13 下仲支援全新 Handoff 功能，當用家返到屋企後用 iPhone 掂一掂 HomePod，新可以將 iPhone 中聽緊嘅音樂、Podcast、電話等轉移至 HomePod 中繼續播放或對話。

Siri說話更好聽  捷徑獨立成App

Siri 喺 iOS 13 中都得到改進，其中 Siri 喺運用咗 Neural TTS 技術後，如果要讀出大篇幅內容，語調將會變得更自然、更好聽。此外，Siri 捷徑功能喺 iOS 13 中獨立成 App，佢可以分析用家習慣，將習慣更快速轉變為 Siri 捷徑功能。

全新 iOS 13 嘅開發者 beta 版即日起已經推出，而公眾試用嘅 Public Beta 版將會於7月推出，而正式版 iOS 13 就會喺今年秋季推出，估計時間與往年一樣，會於9月與新 iPhone 一併推出。