Sony旗下家用遊戲機PlayStation系列，即將於明年年底推出全新PlayStation 5。不過於PS5面世前，PS4嘅累計銷情仍然非常理想，於2019年第2季Sony嘅財務報告得知，PS4嘅總銷量已經超越首代PS，成為Sony旗下銷量排名第二位嘅家用遊戲機。

據消息指，於2013年11月面世嘅PS4，於2019年第2季嘅累計總銷量達到1億280萬部，超越PS嘅1億240萬部，成為Sony旗下銷量排名第二位嘅家用遊戲機，僅次於排名第一位嘅PS2。

PS4由2013年11月起接近開賣左6年時間，期間於2016年為銷量顛峰，全年銷量達到2000萬部，即使去到2018年全年銷量仍然高達1780萬部，終於去到第2季總銷量達到1億280萬部，唔單止超越首代PS，亦同時超越任天堂嘅Wii(1億163萬部)。

再睇番PS4 2019年第2季銷量為280萬部，比去年同期減少110萬部，咁相信亦係預計之內，因為呢段期間不斷有呼聲指PS5即將會推出，因此PS4嘅銷量被影響亦絕對合理。而黎緊PS5明年開賣後，唔知會唔會再創紀錄，成為下一任最高銷量遊戲主機呢？

而值得一提嘅係，如果按照Sony嘅PS4建議售價為$3380嘅話，咁即係話PS4一共為Sony帶來超過3460億港元收入，真係好恐佈！