早前Elon Musk出席Sateliite 2020座談會，席間就被問到大學及企業可以點樣支持學生們去讀大學，幫一啲家庭條件較差嘅學生成功。咁你估本身有大學學位嘅Elon Musk點答？佢話：「你唔使去大學都可以學到嘢，外面有好多知識基本上係唔使錢。」簡單啲講，即係叫大家唔使讀大學！

Elon Musk形容大學係「一堆煩死人嘅功課」，而大學最重要嘅價值，只係在於學生可以喺出社會工作之前，同一班年紀相近嘅人相處，「讀大學基本上係為好玩，同埋證明你做得到基本嘢，但就唔係為學嘢囉！」佢仲話Tesla請人都唔要求大學畢業呢啲咁「可笑」嘅條件，只係要求應徵者有「突出嘅能力」，甚至仲話最好就係中途輟學而且創出一番成績，提出Steve Jobs、Bill Gates以及Oracle創辦人Larry Ellison同莎士比亞都係輟學或者根本冇讀過大學嘅成功人物，證明要成功係唔使讀大學喎！

值得一提嘅係，Elon Musk本人係有大學學位，佢當年喺美國賓夕凡尼亞州獲得經濟學及物理學雙學士，後來去名校史丹福大學讀咗兩日Ph.D就輟學，同細佬Kimbal Musk一齊創立人生第一間公司「Zip2」，於1999年出售予Campag，賺咗2200萬美金。