我以前成日都唔明，點解啲Hello Kitty迷見到任何嘢印咗Hello Kitty個樣，哪怕嗰件嘢根本用唔著都會畀錢買，但近排睇到啲EVA聯乘嘅產品，例如呢Set同Schick聯乘嘅剃鬚刀…我明，我開始明啦。

實際上，Schick都唔係第一次同EVA合作聯乘，之前有出過吊飾，亦有出過剃刀座，而今次就係EVA 初號機、貳號機同NERV嘅配色剃刀，刀身亦分別印有「EVANGELION TEST TYPE-01」、「EVANGELION-02」以及「TOKYO-III」嘅字樣。明明我面就得一塊平時仲要係用電鬚刨，但唔知點解都係好想擁有哂3款！

未完架！因為除咗剃鬚刀，Schick仲推出三款襯返色嘅更換刀片同三款旅行用收納袋，另外Amazon限定特典除咗有哂剃刀同收納袋，仲有三款阿加力膠剃刀座，都只係賣3000Yen，我買！我買呀！