太空移民相信係唔少人嘅夢想，但你依家諗住移民歐洲都好多嘢諗啦係咪？要移民太空就當然有更多問題要解決。其中一個問題就係能源問題，所以美國能源部近日就正式招募私人企業提交計劃，最快有望於2026年建立月面核反應堆。

據Associated Press報導，美國能源部邀請私人企業提交一個「地表核分裂能源系統」計劃，並將由專門研發核能嘅愛達荷國立實驗室(Idaho National Laboratory)、能源部及NASA評估，選出最適合嘅計劃。據報計劃要求反應堆能夠於月球或火星環境下(即係冇天然水)無間斷供應10千瓦電力，而且重量不能超過3500公斤。另外企業除咗要設計及建造兩個反應堆(一個測試用，一個送上太空)，亦要顧及送上太空及登陸機制，而且要於2026年尾或之前完成。其中送上月球嘅反應堆將用作支援探測月球南極嘅行動。

資料來源：Associated Press