距離美國總統特朗普設下、TikTok出售美國業務嘅限期9月15日只係剩返幾日，雖然過去都有多間企業有意收購TikTok美國及其他業務，但到目前都一直未有定案。而據Reuters引述知情人士指，北京政府情願TikTok摺埋都唔畀佢賣。

據Reuters引述三個消息來源指，北京官員認為係咁嘅情況下出售TikTok，會令「字節跳動 (TikTok中國母公司)及中國面對華盛頓壓力時看似懦弱」，所以反對字節跳動出售TikTok美國業務，情願佢直接關門大吉。其中兩個消息來源更指，必要時中國政府會更動上月底推出嘅「科技出口管制規定」以阻止TikTok被賣。而字節跳動回應Reuters時就話，中國政府從來未建議佢哋關閉美國或任何其他國家嘅業務。

而美國總統特朗普週四時指，絕對唔會延長TikTok嘅出售期限，「一係我哋喺美國關閉TikTok，一係佢賣」