相信大家都一定有試過以下呢個情況：冇啦啦個腦飛出一句半句歌、或者幾粒音嘅旋律，但你既醒唔起歌名，又唔知歌詞，想上網Search都唔知要用啲咩字去Search，問人人又驚人家覺得你戇居，咁可以點做？以前就的確冇方法嘅，但Google最新推出咗「Hum to seach」功能之後，就有辦法啦。

um To Search嘅強大之處，就在於容許用家將首歌哼出黎、唱出黎、或者唱口哨出黎都一樣Search到。據《Variety》引述Google高級產品經理Krishna Kumar指，Google嘅機器學習模組會將你哼/唱/吹出黎嘅10秘旋律變成數據，再去對照資料庫中歌曲嘅旋律 (AI自動消去其他樂器聲或音調等)，搵出邊一首最附合你哼/唱/吹出黎嘅音，再向你提供搜尋結果。

值得留意嘅係目前Hum To Search功能只在英文iOS嘅Google App、廿多個語言嘅Android以及Google Assistant上有得用。

目前市面上嘅「以聲搜歌」服務，包括Google自己嘅「SoundSearch」通常都係要聽到原曲先有辦法Search到，但太多環境雜音、或者冇原曲嘅情況之下就幫唔到手。今次嘅Hum To Search未必對大家日常生活好有幫助，但萬一要用起上黎，就可能可以免卻你囉囉攣成日啦。