等咗咁耐，Sony終於出新相機啦，但今次唔係萬眾期待嘅「Sony α7 mark iv」而係被官方稱為全能旗艦機嘅「Sony Alpha 1」，無論拍片定影相都將規格推到極致，結合Sony上代各旗艦機所有能力，具有「Sony α7S III 」拍片能力、「Sony α7R IV」嘅高像素同「Sony α9 II」嘅連拍攝速度。

相機具有5,010萬像素拍攝，連拍速度高達30fps（快過α9 II），支援最高8K@30fps及4K@120fps攝錄，並支援與「Sony α7R IV」相同嘅高像素合成模式，可以後期合成出1.99憶像素超高解像度照片，用嚟影人真係毛孔都睇得清。

所謂天下武功，無堅不摧，唯快不破！「Sony Alpha 1」可以全像素下實現每秒30張連拍速度，雖然現時有30fps連拍相機都唔少，但能夠實現5,010萬像素每秒30張連拍，加上連續對焦及測光，只係得「Sony Alpha 1」做到。

除咗連拍同對焦快，Sony無反一向都比人笑似攝錄機多過相機，今次「Sony Alpha 1」具有8K@30fps功能，大家唔洗擔心有過熱問題。Sony表示「 Alpha 1」機身內有同「α7S III 」一樣內置包圍式散熱片，能夠將CMOS拍攝時所產生嘅熱力傳到機背散走，官方聲稱最多可以拍到30分鐘8K@30fps影片。

呢部頂級旗艦機，當然都有返個「頂級」價錢，Sony Alpha 1建議售價為$6,498美元（約$50,000港幣），創下Sony無反相機價格新高，預計今年3月正式發售。