Bill Gates近年熱衷關注氣候及能源問題，除咗最近出新書講全球暖化，佢嘅「Dimming the Sun」計劃亦將喺今年6月展開測試。希望透過大型熱氣球喺平流層撒石灰粉遮擋陽光為地球降溫，從而緩解全球暖化。

（圖片截自：dailymail）

呢個計劃正式名稱為「Stratospheric Controlled Perturbation Experiment（簡稱SCoPEx）」，研究團隊將會於今年6月，喺瑞典一個小鎮Kiruna展開第一次測試。測試內容簡單嚟講，就係用一個重600公斤嘅熱氣球，升到距離地面20公里嘅平流層，再撤出約2公斤嘅石灰粉（碳酸鈣），從而反射部分陽光，為地球降溫。團隊預計到時平流層會形成一條長幾公里嘅塵埃羽流（Dust Plume），不過由於今次測試規模唔大，所以唔足以影響太陽光照射強度，只係志在測試同埋記錄數據，為日後大規模撤石灰行動做前期研究。

（圖片截自：dailymail）

當初Bill Gates提出呢個諗法嗰陣惹嚟唔少反對聲音，有科學家認為咁做會破壞臭氧層，造成不可逆轉嘅氣侯變化。另外，愛丁堡大學教授Stuart Haszeldine就認為咁做治標唔治本，只會畀政客有藉口唔從源頭解決氣侯變化問題，最終演變到好似吸毒咁，愈撤愈多石灰粉，搞到成個天空變晒白色去保持降溫效果。

（圖片截自：dailymail）

據了解，「人工遮太陽」呢個概念好早就出現，靈感源於1991年菲律賓皮納土波火山爆發，當時火山嘖出約2,000萬噸二氧化硫，幾個月後喺大氣層形成一層硫酸霧，期間反射咗唔少陽光，結果導致全球氣溫下降約0.5°C度長達18個月。

（圖片截自：IMDB）

題外話，點解呢一招咁似《Snowpiercer（末世列車）》劇情？電影講述人類為咗遏制全球暖化，發射一種名為CW7嘅化學物質到大氣層，最終成功將地球降溫，只不過降過龍搞到成個地球變晒冰天雪地。

資料來源：dailymail