近年3D打印技術發展迅速，從一開始打印模型或小配件，逐漸發展到能夠打印人體器官、大型機械、更甚至房屋。近日就有一對荷蘭退休夫婦入住歐洲首間3D打印房屋，佔地面積約1千呎，配備兩間睡房，月租800歐元（約$7500港幣），而且發展商聲稱只花咗5日時間就起好。

雖然幾年前美國就推出過唔少3D打印房屋，無論係純混凝土定係鋼筋混凝土製作、單層定雙層都應有盡有，但喺歐洲嚟講今次就係第一次有合法3D打印房屋。據外媒The Guardian報導，該房屋由24種混凝土元素組成，由工廠打印完各部件再運到工地組裝而成。該項目建築公司就表示希望起到第五套房屋（三層高及三睡房）嗰陣，能夠完全喺現場施工，進一步降低成本。

據了解，荷蘭政府打算喺未來10年興建更多3D打印房屋，以應付目前該國1700萬並且不斷增長嘅人口。而有份參與嘅燕豪芬理工大學教授Theo Salet就認為3D打印房屋係未來趨勢，能夠減少30%耗材，提升建築可持續性。

起就起得快啦，至於好唔好住，業主夫婦就表示間屋外形好似一個地堡咁覺得好安全，隔熱及隔音效果唔錯，完全聽唔到屋外嘅噪音，而且用手機App就可以打開大門，非常方便。