相信大家有睇開網絡影片，都會發現有啲網站嘅片會有走馬燈式嘅留言滑過。呢個名為「彈幕」嘅功最早源於日本網站Niconico（ニコニコ），由於其即時互動特質十分有趣而深受網友歡迎，後來傳到中國更被AcFun及bilibili等網站採用。最近YouTube亦開始測試相關功能，唔知大家會支持定係反對呢？

影片好易就會被彈幕功能「洗版」。（圖片截自：Niconico）

根據外媒gsmarena報導，YouTube於上個月29日公告正測試一項新留言功能「Timed Beta」，令用戶留言可以喺影片特定時間點顯示，換言之即係一種類似「彈幕」嘅功能。現時新功能正處於測試階段，只開放畀部份用手機版用戶試用，預計將來或會陸續開放使用。

不過外國網友就好似唔多鍾意新功能，留言表示「惱人（annoying）功能」、「我情願選擇喺留言上標記影片時間點」、「我哋唔需要呢啲冇用嘅功能」。其實現時有彈幕功能嘅網站，都可以畀用戶自行選擇開啟或關閉彈幕，所以又未必會煩到人嘅，唔知大家支持定係反對呢？