由愛因斯坦創立嘅相對論，被譽為近代物理學兩大支柱之一，除咗改變人類對時空及重力概念，其實際應用亦同人類生活息息相關，各位每日用緊嘅GPS就係透過相對論修正，從而確保定位準確。不過，最近河北燕山大學教授李子豐就宣稱已經推翻相對論，糾正物理學謬誤，為科學發展掃清一大障礙。以「堅持唯物主義時空質能觀，發展牛頓物理學」為題開設研究項目，日前更入圍2021年度河北省科學技術獎。雖然篇論文就未寫，但就因為個題夠晒挑戰性，引起網民及學術界熱烈討論。倘若李教授研究成功，相信會比哥白尼提出「日心說」更具革命性，大家記得拭目以待！

（圖片截自：新浪財經）

綜合中國傳媒報導，李教授嘅研究項目名為「「堅持唯物主義時空質能觀 發展牛頓物理學」，特色在於「堅持馬克思主義哲學」以及「顛覆性創新」。研究內容有多個面向，其中包括「解決物理學與哲學之間矛盾」、「確定意識來源，否定鬼神論」、「避免了物質命名的邏輯謬誤」、「確立正確嘅唯物唯物主義時空質能觀」以及最具爭議嘅「推翻愛因斯坦相對論」等等。

（圖片截自：新浪財經）

由於個研究項目學佢話齋太過「顛覆性創新」，網民們就即刻起底睇下佢究竟係咩來頭，發現李教授曾經喺2008年發表過一篇期刊論文，回應狹義相對論當中時空關係嘅基本假設同觀點，表示基於勞侖茲變換（Lorentz transformation）嘅狹義相對論係錯誤，認為兩個物體之間嘅相對速度可能比光速更快。（簡單嚟講即係佢好早已經出過論文話狹義相對論係錯）

（圖片截自：燕山大學）

另外，有網民就去燕山大學官網睇下李教授嘅學術履歷，點知發現李教授原來係車輛與能源學院教授兼博士生導師，專長係「油氣鑽採工程」同埋「油氣井桿管柱力學」，並冇研究開理論物理學。不過冇研究開又唔代表唔識嘅，愛因斯坦成名之前都只係瑞士專利局嘅小職員，非常期待李教授可以點樣推翻屹立一百多年嘅相對論。

資料來源：新浪財經、燕山大學、微博