繼小米機械狗「Cyberdog」後，今日小鵬汽車旗下科技企業鵬行智能再為大家帶嚟機械人產品，發布全球首款可騎乘智能機械馬「小白龍」。官方表示呢款機械馬功能強大，具備環境多維感知、敏捷穩定運動以及智能情感交互能力，有望成為小鵬（朋）友們首個智能交通工具。

據官方介紹，呢款機械馬係以「獨角獸」為靈感，採用「前膝後肘」、「直膝行走」關節設計模仿馬匹行走步態，以滿足小朋友騎乘需求，如果搭配埋專用裝載配件，更可以成為日常生活運輸小助手。

除此之外，機械馬融合咗小鵬汽車自主研發智能駕駛技術，能夠透過攝像頭、激光雷達識別周圍環境及對象規劃出行走路徑，具備自主運動、目標跟隨、自動避障等功能。同時具備聲紋識別、人臉識別、姿態識別能力，可以透過臉上嘅螢幕及肢體語言表達情感，用戶能夠以觸摸、傾計方式同「小白龍」交流增進感情，而且冇電嗰陣隻馬識得行返去充電座充電。

不過官方就冇透露具體售價及發售日期，只係話未來會解鎖機械馬更多技能。