各位鍾意《鬼滅之刃》嘅朋友，繼劇場版《無限列車篇》上映後等差唔多成年，終於等到第二季動畫《遊郭篇》開播啦，預計10月起於每周日晚上11：45播出。至於先前被指可能會教壞小朋友嘅「遊郭」（即花街、紅燈區）內容，富士電視台就話會忠於原著播出，或者可以解釋到點解今次會移至深夜時段播放。

由於《遊郭篇》故事發生喺「吉原 (現實中存在嘅日本花街地區)」，亦出現「青樓」、「遊女」等相關設定。當官方宣布製作第二季嗰陣就有唔少家長怕小朋友睇完會走黎問佢哋「咩係遊郭、咩係青樓呀？」，繼而引起一番討論。如今負責播放嘅富士電視台表明動畫會「依常規進行審查，不會變更作品内容」，各位粉絲應該可以鬆一口氣，同時亦解釋到點解會移到深夜時段播放。

《遊郭篇》將會緊接《無限列車篇》劇情，講述「音柱」宇髄天元帶領炭治郎一行人，前往吉原花街討伐惡鬼「上弦之陸」墮姬。