雖然Voice Message（語音訊息）功能為唔識打字或打字慢嘅朋友省卻麻煩，但同時令唔少人反感，皆因有啲朋友一句「OK」都用錄音，一係就Send段分幾兩分鐘嘅語音仲要咿咿哦哦，若然播放嗰陣聲量控制唔好，更會出現尷尬場面。不過大家可能唔使再煩惱啦，最近外媒WABetaInfo就發現WhatsApp正測試語音轉文字功能，且而整個轉譯過程會喺手機內完成。

從外媒WABetaInfo截圖可見，WhatsApp新功能支援用戶直接將語音訊息轉譯成文字，而且仲識得按時間點分段顯示，就算朋友Send段成分鐘嘅語音都唔怕會黐埋一嚿。另外，佢哋仲發現第一次用嗰陣系統會詢問是否願意將語音資料傳送到Apple，以改善Apple語音識別技術，由此推斷轉譯功能係利用Apple語音識別技術，所以大家唔使擔心訊息會被WhatsApp或Facebook監聽。

WABetaInfo仲話，當語音訊息轉譯成文字後，相關資料將會儲存喺手機內，用戶重睇嗰陣無需再進行一次轉譯。不過新功能正處於開發階段，以及暫時只支援iOS，未知幾時會正式推出同埋Android版WhatsApp用戶有冇份。