哈佛基因學家George Church將於科技企業家Ben Lamm合作創立科技公司「Colossal」，而呢間公司嘅目標，基本上就係喺六年內整一個現實版嘅《侏羅紀公園》——除咗佢哋唔係諗住復活恐龍，而係猛獁象，同未知係咪順手開埋主題公園。

據報，諾貝爾獎得主George Church及其團隊計劃將猛獁象嘅基因組，放入與猛獁象有99.6%基因相同嘅現代近親，亞洲象嘅皮膚細胞之中，以製造一個「猛獁-亞洲象混合胚胎」，然後就搵隻代母象，又或者直接整個人工子宮出黎養大佢，同時更會利用基因工程令呢種象能夠適應現代北極環境。據Colossal指，如果一切順利，最快六年後猛獁象就會重現人間。

George Church

圖片：Colossal

咁好地地做咩要復活猛獁象呢？咁就要講返些少地理知識。卻說當年猛獁象仲存在時，佢哋係生活喺一種叫「乾草原」，或者直接叫「猛獁乾草原」嘅地形之上。而乾草原雖然又凍又乾，但就有包括猛獁象嘅大量動植物，猛獁象又會推倒大型樹木，又或者食佢哋啲葉，令地區維持草原面貌。而乾草原於冬天時會被雪覆蓋，更能反射太陽光以減緩氣溫變暖。但後來氣候改變、猛獁象等大型動物又因人類捕獵而絕種，令該地區由草地變成生產力相對低嘅樹林，地區嘅生態系統亦隨之改變。

而依家之所以要復活猛獁象，就係希望將佢哋放返去該地區，並重新建構乾草原生態系統。以吸納更多碳排放，減緩全球暖化。唔知會唔會順手將該地區變埋做主題公園呢？

資料來源：Colossal