相信唔少果迷都對iPhone 13彈多過讚，甚至戲稱今代其實係iPhone 12.5，雖然新機尚未正式出貨，但最近著名Apple分析師郭明錤就發表最新報告，預測iPhone 14 Pro機型將會改用「打孔螢幕」設計，並配備4,800萬像素後置廣角鏡頭。至於大家最關心嘅Touch ID，最快都要等到2023年先有機會回歸。今代唔啱心水又唔想轉會嘅朋友，不如再等多一年？

郭明錤預測Apple將會喺2022年下半年推出iPhone 14系列，分別有6.1及6.7寸兩款螢幕尺寸，可能係對應iPhone 14/iPhone Max，亦有可能係iPhone 14 Pro/iPhone 14 Pro Max。其中iPhone 14 Pro系列（即Pro以及Pro MAX）螢幕將會捨棄「瀏海」設計，改用類似Android機常見嘅「打孔」設計，並配備4,800萬像素後置廣角鏡頭，意味住由2007年iPhoen X就出現嘅「M字額」終於可以進入歷史。

屏下Touch ID概念圖。（圖片截自：macrumors）

另外，郭明錤曾經預測2022下半年將會出現首部配備屏下Touch ID嘅iPhone，但佢最新報告就將呢個諗法推遲咗一年，認為Touch ID最快喺2023年先有機會回歸，而折疊螢幕iPhone就要等到2024年先會問世。順帶一提，郭明錤早喺今年3月嗰陣就預測過iPhone 13仍然會保留「瀏海」螢幕設計，只不過收窄咗咁解，而且Pro機型會支援120hz螢幕刷新率，所以佢嘅預測有一定可信度。