當越黎越多車廠推出電動車，相信大家都開始接受電動車就會係未來嘅主流，甚至已經考慮緊換一部電動車。但要換電動車除咗要考慮部車本身嘅性能外，點樣叉電亦係一個必須顧及嘅問題，唔少人就係因為呢個原因，而選擇目前充電站最多、最方便嘅Tesla。不過未來大家可能就唔使有呢個考慮，因為Tesla宣佈會開放旗下充電站，供非Tesla電動車使用。

Elon Musk早年已經有提過，會開放Tesla嘅Supercharger充電站供非Tesla電動車使用，而近日Tesla就正式於荷蘭進行試驗計劃，其他品牌電動車車主只需下載Tesla嘅手機App，揀返「為非Tesla電動車充電」，就可以搜尋並使用目前開放嘅10個Supercharger充電站。而Tesla車主亦可以繼續正常使用該批充電站。不過據Tesla官網嘅文章指，非Tesla車主充電嘅價格應該係會貴啲。

Tesla指開放Supercharger充電站，係為咗推動電動車發展，鼓勵更多人轉用電動車，從而令世界轉向使用再生能源。而今次嘅試驗計劃主要係想測試一下整個模式嘅運作，未來亦有可能於其他國家實行。由於歐洲規定所有電動車條叉電線要係同一規格，實行上比較方便，所以大概會以歐洲為主，反觀美國本土由於叉電線規格問題，非Tesla車主要加個轉接器先用到Supercharger，所以就要等多陣。