依稀記得Facebook剛引入臉部辨識系統嗰陣，身邊唔少朋友都覺得非常新奇，讚嘆點解啲相影到炒晒車都辨識到係乜水，但隨住社會對科技監控疑慮日益增加，愈嚟愈多人覺得相關技術有損個人私隱。Facebook喺今日就作出重大決定，表示將於12月關閉臉部辨識系統，同時刪除超過10億用戶嘅臉部辨識範本（facial recognition template）。

早於2010年，Facebook就引入臉部辨識系統，當用戶上傳照片或影片，系統就會自動標籤入面嘅朋友，而其他用戶上傳有自己嘅相嗰陣亦會收到通知。雖則呢個功能係好方便又可以增加用戶間互動，但同時面臨蒐集個人資料及科技監控質疑，所以後來FB喺2017年開始就畀用戶自行選擇開唔開啟有關功能，到咗2019年更加將該功能預設為不啟用，最終喺今日正式宣布臉部辨識系列走入歷史，而過往嘅數據亦會全數刪除。

Facebook人工智能部門副總JeromePesenti就喺一篇聲明表示，臉部辨識系統本意係用嚟防止身份盜用及詐騙，同時幫助盲人及視障用戶辨識相中嘅朋友，之不過隨住社會對相關科技倍感擔憂，加上監管機構仍制定緊一套明確規則，用於管理臉部辨識系統該如何使用，基於以上不確定因素，所以公司決定關閉整個系統。