除咗科技界睇好「元宇宙（Metaverse）」，就連運動品牌Nike都有興趣！繼前早入紙申請多個虛擬商標後，噚日Nike就宣布聯同線上遊戲平台Roblox推出虛擬世界「Nikeland 」，正式涉足元宇宙。

如果大家仲有印象，早排《魷魚遊戲》好hit嗰陣就有唔少創作者喺Roblox入面製作小遊戲，還原劇中各個刺激關卡。由於Roblox能夠任由用戶發揮想象力創造虛擬內容，用戶既係玩家又係創作者，所以向來都被視為係符合「元宇宙」概念嘅遊戲平台，自然吸引到有打算涉足元宇宙嘅Nike一齊合作。

據官方介紹，用戶可以喺Nikeland入面遊玩各種小遊戲以及認識新朋友，其中包括多項運動比賽，所贏得嘅虛擬金牌仲可以換購各種Nike服飾幫自己個人物扮靚靚，有興趣嘅朋友可以去Roblox了解更多。

資料來源：roblox