隨住科技界盛事CES 2022即將舉行，最近LG就率先發布多款創新曲面OLED螢幕概念產品，分別係結合梳化嘅「Media Chair」、以及結合健身結單車嘅「Virtual Ride」，為用戶帶嚟沉浸式觀賞體驗，另外仲有一個比例獨特嘅16:18顯示器。

所謂嘅「Media Chair」，設計概念顧名思義就係希望帶畀用戶沉浸式嘅影音體驗，採用55吋曲面OLED螢幕，能夠自由切換垂直或橫向顯示，即使改變座椅傾斜角度亦唔會影響用戶嘅觀賞過程，之不過呢嗰裝置目前只係概念階段，未知幾時會推出，LG就表示之後可能會同電競公司或網吧等商家合作。

圖片來源：LG Display

而另一款概念產品「Virtual Ride」，就係由3個55吋4K曲面OLED螢幕，再結合單車訓練台而成，等用戶踩單車機訓練時能夠好似親歷其境，提供戶外踩單車嘅視覺體驗。

圖片來源：LG

除咗上面兩款概念產品之外，LG近排亦公布咗款相對較為實用嘅新品「LG DualUp 28MQ780」，其獨特之處在於全球首創嘅16:18比例，就好似將兩個16:9嘅螢幕二合一咁樣，方便一啲需要多工處理或從事影視製作嘅用戶。

雖則上面堆產品最後會買帳嘅人可能唔多，但確實代表住LG勇於嘗試新嘢，我諗呢方面喺LG退出智能電話市場之前大家都有目共睹，當其他廠一味玩螢幕更大影相更清，佢哋就打算出轉Mon機、捲Mon機，甚至電視都打算用捲Mon設計，希望LG呢份創意可以激發到其他廠商帶嚟更多有趣產品。